هبالي وأنا توني صغنون .....لايفوتكم تحفه

السلام عليكم ورحمة الله وبركاته
أخباركم /طيبين
وشلونكم
المهم(ياخي أشمأز إذا شفت واحد كاتب <الموهيم > أحس أنها طالعه من خراطيش حنجرته )
الموهيم ماعلينا
اليوم وأنا جالس أقلب في منتدى النكت والضحك
وأتفرج وأنا أفكر في نفسي أقول ياولد متاك منزل موضوع بالمنتدى
قلت لازم أجمع عصارة مخي التحشيشيه وأنزل ذاك الموضوع الفله
نتوقف مع الإعلان لنواصل باقي برامجنا

stc حياة أسهل

نعود لإستكمال باقي الموضوع
بس والله ياهالشركات ماخلتني في حالي كل شوي داقه علي شركه يقولون تكفى سوي لنا إعلانات بموضوعك
عاد لازم نرضيهم
المهم
وأنا أسمع صوت أذان العصر يصدح في سماء مدينة الضباب الرياض عروس نجد وجوهرة العرب<ترى كل هالألقاب من راسي يعني لحد يسرقها>
المهم سمعت الأذان
وأتذكر يوم توني صغير أيام الطفوله تقريبا صف ثالث إبتدائي تذكرت أمي الله يحفظها
لاجت تقومني من النوم عشان الصلاة
تجي ومعها الأسلحه التاليه:
*زبيرة أبوي
*كاس مويه
*عصا المكنسه
وبعد ماتستخدم هالأسلحه باليالله أقوم بحكم أني ثقيل طينه وإذا قمت وطلعت من البيت ونطنطت شياطيني حسيت بكسل وأنا الي أسحب على الصلاة وأروح لبيت طين جنب المسجد ألعب وأمرح فيه مع القطاوه والعصافير لين يخلص الصلاة
عاد الحين بروح أصلي وأترككم مع الإعلان لين أعود

أيسكريم كون زون
طبيعي ولذيذ مره

المهم بعد هالإعلان الطويل نرجع لموضوعنا
ساعات الواحد إذا جلس مع شباب تجيه نشوة هياط غير طبيعي يعني لو تقوله نط في النار نط ماعنده مشكله من زود ما أنه أرتفع هرمون الرجوله
مره من المرات جالسين مع الشباب عند قصرنا العزيز قصدي بيتنا وكل واحد يهايط على الثاني
وفجأه وبدون مقدمات يمر ذاك الهندي الي مشبوب في شعره وبراطمه كنها كبد بعير
وريحته تقول سيارة البلدية ماره
وفي ثمه زقاره
نطل الزقاره في الأرض وراح
وكلنا نعاين هالزقاره
نط واحد من الملاقيف ربعي وقال من الرجال فيكم يروح يكمل باقي الزقاره
وأجاوبه وبكل فخر:هو فيه رجال غيري أنا طبعا
وأتجه إلا الزقاره بكل عنفوان البزاره وأرفعها من الأرض وأشوف فيها باقي سعابيل هالهندي بس قلت بصره
سعابيل الهندي أرحم من أنهم يقولون عني مانيب رجال
وأحطها في ثمي وأوقف كني بزنس مان وأشفطها ذيك الشفطه لين قمت أكحكح
عقبها تبت أسوي رجال
لا ولامره
تدرون خلها بعد الفاصل

مرحبا
معاكم بوشيخه
إقرو مقالاتي الجريئه بجريدة الدار

جريدة الدار
لأهل الدار

عدنا بعد الفاصل
ساعات لاجيت أفكر ألحين
أقول ليش أحنا أغبيا يوم كنا صغار
لدرجه تصل للبقاره

مره من المراة وصاني أبوي
كان جالس في بيت الشعر وشاب النار وقالي
رح جب وأنا أبوك لي عود من داخل
أنا طلعت أفكر ساعه عند الباب
ياترا أبوي وش يقصد بعود
وغرقت في تخيلاتي
افكر
أبوي شيقصد
أبوي شيقصد
قلت أكيد عود يقصد عود
يعني عود شجره
وأروح للحديقه وأقص له عود من النخله وأروح أوديه له
في هاللحظه أمي شافتني
قالت وين بتروح
قلت أبوي موصيني يقول جبلي عود وبروح أعطيه إياه
وفي هاللحظه تنفجر أمي ضحك
جعلني ما أبسيها
قالت خذ هذا عود رح وده وأنطل الي معك
وتعطيني كسرة عود يعني طيب
طلعت منها وأنا مانيب مصدق أن هالكسره هي الي أبوي يبيها قلت شكل أمي فاهمه غلط
وأنطل الكسره وأروح أودي له عود النخله
طلعت من عنده
بس بعد ما تفقع وجهي وكسر طقم أسناني
والحمد لله على نعمة الغبا

نتوقف مع أخر إعلان لموضوعنا

بدون حدود أو شروط
جميع مكالماتك لأي جوال أو هاتف مع إنترنت سريع أربع ميجا بفاتورة شهريه ثابته
فقط من باقة
برود باند جود بلس
stcحياة أسهل

نرجع إلا أخر فقره في موضوعنا
مره من المراة أبوي دخل علينا وقال يالله أستعدو نبي نروح للمغرب
قلت لا يبه نروح العشاء أحلى
ماهقيت ألا بكف يمشي ترلليون كيلو
المهم جهزنا شناط السفر
وجاء موعد السفر
وأنا أتروش
وألبس أحسن ثيابي
ثوب أصفر قصير لا لبسته جلس سروالي كني مدرس رياضيات
وذيك الطاقيه الزري طبعا
وأكشخ بكنادر الرياضه
ونتجه للمطار
وكل خلق الله يطالعوني وأنا أحس أني مشهور
وأجلس أتمشى في صالة الإنتظار
عشان أذوب قلوب البنات
كل ماشافتني بنت تضحك
قلت لاشكلي مهم لهدرجه
وصلنا للمغرب
وأنا أشوف خلق الله
أشوف بنات بدون عبايات كنهم يتمشون في بيتهم
وأنا أطالب أبوي أقوله رح لقسم الرجال عيب عليك هنا حريم وبس
ونفس الكف الأول بس هالمره سبب لي دوخه
المهم رحنا الفندق وإلا على الإستقبال ذيك البنت الي تطرح الطير من الطياره
أشوفها تناضرني وتضحك وبالتحديد تناضر طاقيتي الزري
المهم عطونا الغرفه وسكنا وصرت كل شوي أنحاش من الغرفه وأجي أنشب لهالضعيفه
لين طقت سبدها مني جا يوم وجيت بأنزل لها وتدق على الغرفه وتقول لبوي ولدك عندنا تعال خذه الله ياخذه ولد
ويجيك أبوي طاير وممتطيا صهوة جواده كنه الفارس الملثم
والله يأنه طقني طق مردغني عند الإستقبال كفخني تكفخ لين رجعنا للسعوديه وأنا بالع العافيه

تحياتي

أنتضر ردودكم بفارغ الصبر

تحياتي الكم

هه
يسلموو سفير

يسلمووووو باشا ع المروور

ههههههههههههههه

يسلمو يا سفير

تحياتي الك

يسلمووو ابو نجيب ع المروووور

هع هع

يسلمووو ابو علي

يسلموووو ابن دير البلح ع المروووور العطر

» لايفوتكم جعااان بيغني بحبك وحشتيني
» صور حمامات تحفه..
» اتيت وأنا كلي شوق اليكم فاليكم ماراق لي
» كالديرون: كاكا كان سيأتي عاجلا أم آجلا وأنا من مهد الطريق لرونالدو